交友app騙案新聞，差不多每個月都係有，而且騙案金額，由幾萬蚊至成千萬!!! 想識個朋友姐，唔通真係唔可以用交友app ？ 我哋都聽聞過交友app有成功例子，但係交友app都唔會核對對方真正身份，所以有非常多不法分子用呢個漏洞作出行騙。俾人騙去血汗錢嘅機會，分分鐘仲多過成功機會！
以下交友騙子5大特徵，大家要好好記住，小心提防呀！
1. 對方身處外地 + 優秀職業*99%騙案*
假如對方係身處外地嘅外國人，仲要有優秀嘅職業，例如軍人，做生意，CEO 等等嘅職業, 就要留神啦！女士如果遇到呢類型嘅男士一定會心心眼，但細想吓, 佢有咁既條件, 竟然响當地都揾唔到女朋友, 要越洋揾異地情緣? 而且咁好條件，應該日理萬機，日忙夜忙, 仲邊度得閒用交友app慢慢識朋友同你調情？
2. 從未見面，但態度親暱，暖男攻勢
如果對方從來未同你見過面，但係好快（幾日甚至一個星期）就同你表白，叫你Baby, love, 老婆。而且出奇地成日關心你噓寒問暖，大家就要清醒啲，唔好咁容易中計啦！
3. 塑造命中注定白馬王子的形象
被騙嘅女士，通常最初會懷疑，點解你突然間對我咁好？你究竟係唔係真係鍾意我？所以，騙徒最鍾意利用”命中注定”去令成件事合理化。因為愛情係冇得解釋，佢”話”鍾意你係唔需要你任何條件。邊個話吳彥祖唔可以愛上黃夏蕙？不過，現實上機會又有幾大？都係清醒啲啦！
4. 完美背景及性格
騙徒最喜歡塑造自己完美嘅形象，例如外表靚仔又高大，事業有成，有愛心，孝順父母，專一，冇乜朋友唔會出去玩，仲好細心，仲要有圖有真相（當然嗰啲圖係騙徒群組大家share ）。一時比愛情沖昏頭腦嘅女士，就好容易照單全收！
5. 用任何形式及藉口拿取金錢
最後，到咗戲肉，騙徒覺得差唔多可以收成嘅時候，就會借啲意用任何藉口，問你攞錢。 佢可能會話用嚟同你結婚，話遲啲還俾你。或者我咁有錢，點會貪你嗰少少錢等等一萬個理由。但係無論係咩理由都好，只要係問你借金錢，就已經係代表騙案嘅開始！
所以，各位女士，大家玩交友app嘅時候真係要萬分小心。或者，可以參加返正常speed dating 活動，嗰啲都係願意踏出一步, 出門去認識朋友嘅人，一定比玩交友app的更有誠意。又或試吓我哋嘅單對單配對，所有會員嘅身份，學歷，收入等等都會查證。約會期間完全唔需要擔心對方係交友騙子！
約會咨詢預約～
